IES Praia Barraña (Boiro, ACoruña)

En tempos de crise existen un milleiro de factores que condicionan o noso modo de vida. O primeiro, a simple vista, sería sen dúbida algunha o económico. Desaceleración, recesión, caída bursátil… Todos estes son termos que chegan a cotío aos nosos oídos e quedan gravados a lume no noso subconsciente. Soñamos con remontar unha situación que semella insostíbel. Un día espertámonos e camiñamos ata o hospital. Temos que pasar unha revisión sen maior importancia, que nos deixa con expresión conxelada ao darnos unha nova inesperada, temos unha enfermidade incurábel, e o peor de todo é que puidemos evitala, mais non o fixemos. Entón espertamos no medio da noite e decatámonos de que todo foi un pesadelo. Deixamos de pensar nos cartos e pasamos a preocuparnos por outro problema que estábamos esquecendo, a saúde. Que ten maior importancia, os cartos ou a saúde? Esa é unha pregunta que moitos nos fixemos algunha vez e que case sempre respondemos do mesmo xeito coa resposta obvia. Non obstante, facémolo imposíbel por acadar fortuna, mentres case nin nos molestamos en botar un ollo a o noso corpo. A maioría non nos coidamos como deberíamos, e os que o fan, ás veces mesmo se exceden no tópico de “poñerse en forma”, chegando a superar os límites do esforzo, e esta actividade excedida ao longo acaba pasando factura. O mellor modo de sobrelevar unha crise é a calma e a saúde, tanto física como mental, xa que o estres nunca foi un bo aliado. A miña opinión é, desde logo, pensar un chisco menos nos bancos e adicar esa pequena parte do noso tempo a nós. É o noso deber, se non queremos morrer novos de máis e sen gozar da nosa vida.

Tags: crise, enfermidade, saudable, saúde, vida